Poesias premiadas in su cuncursu de Frussio - (Sonetos)

Bos cherimus presentare sas poesias premiadas in s'ùrtima editzione (de su 2019) de su cuncursu de Frussio. Oe proponimus sas poesias premiadas in sa setzione "Sonetos" posca, in sas dies chi sighint, publicamus sas àteras òperas premiadas. Agatades sas poesias a manu manca de custu blog, in sa pàgina chi lis amus dedicadu. Bona letura!

(M.G.S.)

"S'isciareu - Augusto Piras", ùndighi annos de sentidos in poesia

Ischimus chi sa poesia est un'arte antiga meda e in sas biddas nostras tenimus testimonias de custu cun sas òperas de poetes de eris e de oe. In medas si diletant a cumpònnere versos dende vida a poesias de calidade. No est fàtzile e non totus l'ischint fàghere, bi cheret arte e sensibilidade e tantos donos chi unidos a pare permitint de fàghere poesias de valore. Pro custu, in su 2008, in sa bidda de Frussio est nàschidu su primu cuncursu de poesia de Pianalza, dae un'idea de sa bonànima de Augusto Piras e de s'amministratzione comunale. Su cuncursu (articuladu in duas setziones, "Sonetos" e "Otadas") tituladu tando "S'Isciareu" e como, dae cando Augusto nos at lassadu, "S'Isciareu - Augusto Piras", contat ùndighi editziones, s'ùrtima fata in su 2019. 

Custas sas poesias premiadas:

SETZIONE OTADAS
1° Prèmiu: “ÙLTIMOS” de Sandro Biccai – Sindia
2° Prèmiu: “SOLIDARIEDADE” de Ignazio Porcheddu - Posada
3° Prèmiu: “BISENDU SA TERRA, SA PAXI” de Dante Erriu - Silius

MENTZIONES
“Oje che a eris” de Gonario Carta Brocca - Dorgali  

SETZIONE SONETOS
1° Prèmiu: “PERDONAMI FIZU” de Antonio Sannia - Bortigali
2° Prèmiu: “OJE NO APRODAT SA BARCA” de Bachisio Goddi - Orune
3° Prèmiu: “CAMINOS CUADOS” de Giangavino Vasco - Bortigali

MENTZIONES
• “In sa campagna” de Maurizio Faedda - Ittiri
• “Una cumeta” de Angelo Contini - Arzachena
• “E deo ite ti dò?” de Giuanne Piga - Nuoro
• “Pal te!” de Gigi Angeli - Palau
• “Paulu” de Franco Piga - Loiri
• “S’àlvure ruta”de Salvatore Deriu - Ittiri  

PRÈMIU “ROTARY”
“Frades in tribulia" de Eliano Cau -Sorgono 

PRÈMIU “AUGUSTO PIRAS”
“Veranu” de Salvatore Ladu - Mamoiada

(M.G.S.) 

Gosos in onore de Santa Rita festada in Tinnura

Su 10 de maju de su 2014 s'est fata sa beneditzione de sa crèsia de campagna, in su territòriu de

Tinnura, intitulada a Santa Rita. Est in localidade Corrau, in s'istrada chi andat dae Tinnura a Sàgama. Pro cussa ocasione ispetziale Luciano Sechi de Magumadas (ma de ratza tinnuresa) at cumpostu sos gosos in onore de sa Santa chi cun praghere bos proponimus.

(M.G.S.)

GOSOS DE SANTA RITA

In sa pius orrorosa

dilgràtzia o tribulia

recurrimos a tie ebbia

Santa Rita meraculosa.

1. Apena sezis naschida                                                          

de gràtzias e donos piena

in sa idda 'e Roccaporena

che frisca rosa dechida

azis cumintzadu sa vida

de santidade virtuosa.

Recurrimos...

2. Dae sa prima pitzinnia

Deus donos bos at dadu

e a bois at intregadu

sos chi sunt in angustia

pro los sucurrer in bia

cun mirada portentosa.

Recurrimos...

3. Deus sas manos sagradas

bos at postu in su bratzolu

cando sas abes a bolu

in buca si sunt caladas

ponent mele, ammasetadas

in cussas laras de rosa.

Recurrimos...

4. No bos curret in favore

un'unione mal'andada

cun tristura e angustiada

provades onzi dolore

bos azuat su Segnore

cun forte manu piedosa.

Recurrimos...

5. Su maridu bos ant moltu

fiuda sezis restada

afrigida e isconsolada

pianghinde a pilu isoltu

chenza perunu cunfoltu

in sa vida penosa.

Recurrimos...

6. Fizos bostros po pagare

cudda crudele molte

detzidesint sa solte

de chie sacrificare

e de chie iseniare

cun sa daga sambenosa.

Recurrimos...

7. Bos at fritzadu su coro

cuddu feu determinu

cudd'aficu chi continu

fudi in sa mente firmadu

ca azis pregadu e bramadu

de los bìere in sa losa.

Recurrimos...

8. Gai Deus bos acansat

su chi l'azis pregadu

cun su coro isconsoladu

cun dolu chi l'iscancat

cun piae chi mai tancat

in s'ànima lastimosa.

Recurrimos...

9. Sa vida in su cunventu

de finire azis detzisu

ma bos negant de improvisu

e no atzetant s'intentu

ma unu celeste entu

bos collocat gloriosa.

Recurrimos...

10. De Cristos addoloridu

azis crèfidu alleviare

sos dolores e bogare

sas puntas chi aiant fichidu

e in fronte azis retzidu

cudd'ispina dolorosa.

Recurrimos...

11. Azis nadu a su Segnore

pròpriu in s'ora de sa molte

si tenizis sa solte

de bìere unu fiore

e de ilgerru, in su rigore,

bos batesint una rosa.

Recurrimos...

12. Rita santa bos pregamos

cun su coro penitente

e faghide chi sa zente

si cunvertat tota canta.

Chi siat bona, chi siat santa

e de Deus timerosa.

Recurrimos...

13. Custa crèsia chi Tinnura

bos cheret intitulare

siat faru singulare

chi adornat sa natura,

siat logu de dultzura

e de fide poderosa.

Recurrimos...

14. A sa idda de Tinnura

àltzia sa manu piedosa

e sa mirada diciosa

pro chi chentza disaura

passet sa vida segura

acansendeli onni cosa.

In sa pius orrorosa

dilgràtzia o tribulia

recurrimos a tie ebbia

Santa Rita meraculosa. 

 

Silanos - Inauguratzione "Domo de sa poesia cantada"

Domìniga 9 de austu 2020 in Silanos s'at a inaugurare Sa domo de sa poesia cantada, unu museu didàticu-informativu aprontadu dae Domus de Janas Editore paris cun su Comune de Silanos.

Su progetu cheret fàghere connòschere sa poesia a bolu ispieghende s'ambiente in ue est nàschida, sos protagonistas e sas curiosidades cullegadas a cussu mundu pro mesu de testos, immàgines e de sos archìvios de Domus de Janas, chi at sarvadu chentinas de garas gràtzias a sa passione de Pàulu Pillonca, chi fiat amantiosu meda de custa forma de arte.

Comente mai custu museu naschet in Silanos? Ca fiant silanesos duos de sos cantadores prus famados, Frantziscu Mura e Mario Màsala, chi ant allegradu sas festas de Sardigna dae su 1953 a su 1999: prus de baranta chimbe annos de carriera paris, una cosa chi no est capitada mai in bidda peruna.

S'inauguratzione s'at a fàghere a sas 8 (h 20,00) in pratza de Carraghentu, e a pustis s'at a pòdere visitare su museu chi est in "Casa Aielli".

Pro tènnere prus informatziones in contu de su museu si podet intrare a su situ de Sa domo de sa poesia cantada. Pro prenotare una bìsita (e chie cheret si podet finas atrivire a cantare in palcu, ca su museu nd'at aprontadu unu) cheret cumpiladu custu mòdulu o si podet telefonare a sos nùmeros 070-5435098 o 340-7837789.

(GF.P.)