Sinzos de poesia est una regorta de 100 poesias de Angelo Maria
Ardu, de Frussio. Apassionadu de poesia dae pitzinnu minore, at semper sighidu
sas garas poèticas in sos palcos, dae Remundu Piras in poi. In su 2008, cun s’agiudu
de sa biada de Augusto Piras de Sune dat vida a su cuncursu de poesia
“S’Isciareu”. Dae cussu momentu cumintzat a contivigiare sa poesia de meledu, a
s’apassionare, a istudiare bene sas règulas e a pònnere in pràtica sos cussìgios
bonos de s’amigu Gigi Piu. Ca, comente narat Sandro Biccai in sa presentada de
su libru, “Po fàghere poesia bi devet
èssere sa natura. Est issa, sa natura, chi costoit su donu e lu cuntzedit a
caligunu e a àteros nono…A su donu, po chi crescat forte e non s’intròtighet a sos
primos bentos cun su perìgulu de si ch’andare, tocat de l’alimentare fitianu
cun cosas bonas e sustantziosas”. E pròpiu custu at fatu e est sighende a
fàghere Angelo Ardu. In su 2009 iscriet sas primas poesias e cumintzat a partetzipare
a sos cuncursos in Sardigna e calicunu fintzas fora. In pagos annos binchet
paritzos prèmios in logos meda. In su 2018 pùblicat su libru "Sinzos de
poesia”, 100 poesias in parte inèditas e in parte premiadas pro sos temas
tratados, pro sa bellesa de sos versos e pro sos sentidos chi su poeta mustrat
cun delicadesa in sos cumponimentos suos. E non podet mancare sa poesia
dedicada a bidda sua:
FRUSSIO
Sun treghentos sos metros, bidda mia,
chi t’an subra su mare collocada,
ses cun alte, suore e maestria
in terra ‘e Panalza fraigada.
Dae
sas friscas frinas carignada,
Ti sorriet su sole in d’ogni via;
a totu sos ch’as dadu sa nadìa
ses che mama in su coro riservada.
Passentziosa, tempus bonu e feu
In binzas e masones impreadu,
laores
cun fadiga as incunzadu,
a che mastra cosidu as isciareu;
e i sos fizos chi lustru t’an dadu
godan sa paghe cun s’amore ‘e Deus.
Auguramus a su poeta de lassare ancora “sinzos” meda de poesia!
(M.G.S.)
