Sa literadura sarda, pro chie la connoschet pagu, paret literadura de pagu contu a paragone de sa literadura italiana o de àteras literaduras europeas, forsis ca pro tempus meda nos ant fatu pensare chi pro èssere calculados tocaiat a s'ismentigare de sa limba e de sa cultura pròpia.
Chie s'acostat a su mundu de sa poesia "a bolu", però, cumprendet luego chi s'agatat in dae in antis de unu mundu meravilliosu, de una de sas mègius espressiones de sa cultura sarda. Est su chi at fatu Mariangela Brisi chi, movende dae sas intervistas a sos betzos de Iscanu, at analizadu istruturas, ritualidade e contenutos de sas garas de poesia.
Su traballu est nàschidu comente tesi de làurea. In su 2018 s'Amministratzione comunale de Iscanu, dae semper atenta a s'istòria e a sa cultura locale, at istabilidu de lu fàghere publicare pro chi totus esserent pòdidu godire de custu bellu traballu.
Pro chie lu cheret comporare, su tìtulu cumpletu est Poesia e oralità - La poesia improvvisata in lingua sarda (Carlo Delfino editore, Sassari, 2018).
(GF.P.)