Pedru Zedda, nàschidu in Gavoi in su 1923 ma residente in Montresta pro una vida, in sos cumponimentos suos tratat de cosas antigas e de cosas modernas, sena cuare sa nostalgia pro unu mundu chi a bellu a bellu est isparende.
Sa poesia sua tratat de amore e disamistade, de ambiente, costùmenes, sotziedade e poesia.
Nos praghet a ammentare inoghe su cumponimentu chi mentovat sa nàschida de Montresta, argumentu drammàticu chi aìamus tratadu prus de una borta finas in su blog In sardu est prus bellu.
In su cumponimentu Sa fundatzione de Montresta Zedda narat
[...] Chentu famìglias de grecian' intragna
in pagu tempus in Montresta sun(u)
pro ocupare foresta e campagna.
Dae Còrsica unidos in comùnu
sos Grecos a Montresta sun bennìdos
su mill' e setighentos chimbantunu.
In s'artìculu "Comente sunt isparidos sos Grecos" aìamus ispiegadu chi custos massajos grecos no aiant tentu vida fàtzile pro sas
cuntierras cun sos pastores bosincos chi si cheriant meres in cussas
terras:
e sos pastores los odiaian(a)
ca sa cussorza lis an incurtzadu
e pius libertade non tenian(a).
Dae in cue a detzìdere de los ochiere su passu est istadu curtzu (leghe s'istòria in s'artìculu "Montresta - Sa pelea de sos Grecos").
A pustis de chentu annos dae s'insediamentu, de totu cussos Grecos in Montresta bi nd'aiat abarradu duos ebbia, e de sos sambenados de sos fundadores bi fiat abarradu ebbia su de sa ratza de sos Passerò.
Bi fian Casaraccia cun Pagòna
Stefanopoli e Apostolacci
zente triballadora onest' e bona.
Medici cun Bosici e Pataraci
sambenados chi mai aia intesu
Busicina, Conneno e Figuraci,
Nacicia, Cassarà cun Iscorchesu
ma si sun isparidos sos pius(u),
no nd'esistit vicinu ne atesu.
Pro chie tenet praghere de lèghere custu cumponimentu (e totu sos àteros), ammentamus chi su libru de Pedru Zedda l'at imprentadu sa Stamperia Artistica de Tàtari in su 1996.
(GF.P.)