 |
| Fotografia iscarrigada dae su web |
Oe cherimus faeddare de "Toccheddos de coro", una de sas cantzones prus bellas iscritas dae su poeta nugoresu Frantzischinu Satta (1919-2001) e dedicada a sa mugere, poesia chi tratat cun delicadesa sos temas de s'amore in totu sas edades de sa vida, movende dae s'amore de sa pitzinnia cando "bolabamus in artu, in sas istellas" e "su mundu fit arcana sinfonia / ca bi fis solu tue, tue ebbia".
Su poeta decrarat s'amore suo pedende perdonu "si su coro no ischit faveddare chin affettu" e narende chi s'amore cun s'edade non passat, antzis "sos toccheddos de s'amore / sun prus craros" mancari s'ànima siat in patimentu ca "timet s'attonzu, timet su dolore".
Custu capolavoru de Satta est istada s'ùrtima cantzone armonizada dae su mastru Tonino Puddu (1951-2008) in antis de mòrrere.
Bos la proponimus in sa versione cantada dae su coro Su Nugoresu in su 2009 (incarca inoghe).
Pro nd'ischire de prus de Frantzischinu Satta podides incarcare inoghe.
(GF.P.)
Toccheddos de coro
Chin sos prus bellos versos ti ricamo
sos sentimentos limpidos d'incantu.
L'ischis, columba, l'ischis; ischis cantu
t'hapo semper amau e cantu t'amo.
Non cherjo, non pretendo, mancu bramo
chi tue, bella, m'ames cantu t'amo.
E ti pedo perdonu si su coro
no ischit faveddare chin affettu;
issu pro tene patit in segretu,
issu pro tene patit penas d'oro.
Ses su bene, ses s'unicu tesoro,
ses su tesoro, ses s'unicu affettu.
A ti l'ammentas cando in pizzinnia
bolabamus in artu, in sas istellas,
nandenos semper solu cosas bellas
in d'unu chelu tintu 'e fantasia.
Su mundu fit arcana sinfonia
ca bi fis solu tue, tue ebbia.
Como chi sos toccheddos de s'amore
sun prus craros, su coro est in turmentu.
S'anima, prus de prima in patimentu,
timet s'attonzu, timet su dolore.
Bolat semper in artu a cada bentu
su sentimentu candidu 'e s'amore.