Est su chi at fatu Antoni G. Puggioni, modolesu, chi cun una chirca atenta e apassionada durada paritzos annos at bogadu a campu datos, contos e novas de sa Mòdolo de unu tempus chi at regortu in unu libru intituladu Modolo tra storia e leggenda (Bosa, Tipografia San Giuseppe, 2009).
Amus publicadu bortas meda, in su blog "In sardu est prus bellu", sos contos bogados dae custu libru (los agatades in custu link), ma oe cherimus faeddare in manera particulare de una cantzone antiga intitulada "Pregadoria a Babbai 'Etzu", chi mentovat su contu de cando a sos mortos los poniant a sicare in pedras sacrificales postas a curtzu de sos nuraghes.
Sa cantzone invocat unu "Babbai 'Etzu", òmine istimadu e rispetadu ca at "unidu meda zente / de sas baddes modolesas e nuraghes", chi si nch'est mortu lassende sa gente sua in afritzione e dolu.
Sa nova trista si la passant dae nuraghe in nuraghe sonende corros e conchìgios ("Sonadu at su conchizu dae Corona / rispostu at su corru in Albadanis / in su Calmene su toccu 'e sa malora") e allumende fogos ("Paltidu este s'avvisu dae su Monte / cun tristura ant alluttos sos nuraghes"), e totu sos capotribù movent pro l'onorare "in coronas de pruinca imboligados / attitendedi tottu a manos giuntas" ('adornati con corone di pervinche, piangendoti a mani giunte').
No ischimus in cale tempus est istada cumposta custa cantzone chi sos betzos ant tramandadu, ma nos praghet de pensare chi benit a beru dae su tempus lìberu de sos nuraghes, cando sos "Babbai" fiant rispetados dae totus ca rapresentaiant su sabiore e sos cussìgios de s'esperièntzia.
(GF.P.)
Pregadoria a Babbai Ezzu
(moltu e postu a siccare in sa pedra lada de su nuraghe de Monte Nieddu)
Babbai chi dae sa pedra ses bedinde
sos fizos tuos meda isconsolados
chi bènnidos nde sunt gai currinde
a cando sun bistados avvisados.
Bie sos de sas ispilluncas
cun roccos e fastizzos appiccados
in coronas de pruinca imboligados
attitendedi tottu a manos giuntas.
Ch'est puru sa zente 'e sa Funtana
e sos chi an fattu domo in Sossolaggios
sos betzos che sunt tottu cun matana
finzas dae Coronedu sos massajos.
De Monte Cuccu e dae Signorolene
da Punta sa Ristigia a sas abbas de Cannedu
abbaja tottu ti cherian bene
e ti pianghen cun coro sintzeru.
Sonadu at su conchizzu dae Corona
rispostu at su corru in Albadanis
in su Calmene su toccu 'e sa malora
timinde tottu cantos su magrassu!
Appeddende arrennegados sunt sos canes
acudidu at finzas zente dae Su Frassu
Paltidu este s'avvisu dae su Monte
cun tristura ant alluttos sos nuraghes
su caminu s'ant leadu po su ponte
ant tepidu currinde inie passare
in sa pedra t'ant postu a siccare
po pius de trintaghimbe dies
sa chiza tua no est a imentrigare
mancari passent caluras e nies!
Preparadu in sa punta hant tumba manna
cun pedras sas mezus de sa cava
piantadu bi ant a pese una pramma.
Dromidu ses Babbai e non nos bies
Tue chi as unidu meda zente
de sas baddes modolesas e nuraghes
cun mannu coraggiu et sientzia in mente
chi non podimos mai imentrigare.
Abbaia dae su sonnu 'e sa siccagna
tottu sa zente chi as crèfidu 'ene
beneighelos tottus e sas campagnas
dae Palabadru a Signorolene.
Sas paltes de su riu a destra e a manca
sas tancas de Su Padru e de Sas Roccas
sos litos de Mutteti e de sa Tanca
dae Montagudu a Punta 'e sa Biccocca.
Beneighe. Nos tottu sas impresas
cun suore e tribagliu pressighidas
dae tottu sas zentes modolesas
intro a su coro tou bene remunidas,
et gai siat!