Carchi die a como amus tentu su praghere de lèghere una nova bella in su giornale "La Nuova Sardegna". E pròpiu dae unu giornalista de custu giornale, Luciano Piras, est partida s'idea pro un'initziativa curiosa a beru. Si tratat de una gara poètica moderna, disputada in whatsapp! Tres sos poetes postos in parte: Angelo Maria Ardu de Frussio, chi l'est tocadu comente tema "sa fìgia"; Sandro Biccai de Sindia, chi at dèpidu fàghere sa parte de "sa mugere", e Mauro Piredda originàriu de Bànari ma residente in Thiniscole, at cantadu "sa mama". Tres poetes amantiosos de sa poesia e de sas garas poèticas e chi ant bìnchidu paritzos prèmios de poesia. Custa borta si sunt isfidados pari pari, a corpos de otavas (sèighi onniunu), pro difèndere su tema assignadu. Dae su grupu de sos tres poetes amigos sa gara at tentu difusione prus manna e cunsensos meda.
Chie tenet su praghere e sa curiosidade de la lèghere podet intrare in su blog @ddurudduru de Luciano Piras.
(M.G.S.)