In su 1985 su cuncursu "Antoni Piludu" de Iscanu fiat movende sos primos passos: fiat sa segunda editzione e b'aiat partetzipadu in totu 16 persones, totus de Iscanu ca su cuncursu fiat nàschidu pro dare boghe a s'amore mannu chi sa bidda at semper tentu pro sa poesia.
In mesu de sos cumponimentos bi nd'aiat unu in versos lìberos, sena nùmene, cun unu paranùmene chi faghiat pensare a una vida de disterru: "Peldulàriu iscanesu" ('vagabondo scanese'). Su pathos e sa bellesa de custa poesia l'ant fatu bìnchere su primu prèmiu e l'ant fata abarrare in s'ammentu de totu sos iscanesos chi l'aiant intesa e apretziada.
Faeddat de "domos abbandonadas / dae annos", cando su fàmene aiat custrintu sos pòberos a si nch'andare "po iscolturare terras furisteras" disigiadas e sonniadas, ma "ingannadoras che fèmina mala".
In custas domos fatas de "intragnas nieddas / de pedras mugoradas", in ue giannas e frenestas sunt istangadas, b'abarrant ebbia sos "ammentos chi nisciunu ammentat prus".
(GF.P.)
Domos serradas
Boideras de idda
domos abbandonadas
dae annos
dae su tempus istemperadu
de su famene zegu,
cando s'isperanzia de sos fizos,
s'isettu 'e tempos rassos
hat giampiadu su mare
po iscolturare terras furisteras
in frabicas e istallas
intro 'e sas minieras
a muruttulos
comente albeghes in s'accorradolzu.
Domos serradas, giannas e frenestas
tupponadas, presones
po custoire in intragnas nieddas
de pedras mugoradas
ammentos chi nisciunu ammentat prus,
suspiros suspirados
in nottes de timoria
cando sos temporales,
tronos de assustu e lampos de tristura,
istudaian in laras
finzas s'obbrigassione.
Sos poltellitos de su tauladu
de su sostre prus baltu
iscanzados appenas
po regoller sas muidas
de sas carrelas fattas a parcheggiu,
po connoscher una oghe
chi hat lassadu sonu e melodia
in chilca 'e sa pizzinnia
peri sas terras bramidas
ingannadoras che femina mala.
Domos serradas
ischios po ninnare soledades
de fentanones e de passizzeris
cun pasteras de oltiga e de prammitta
chena colores e chena profumu,
domos mudas chena mancu un'attitidu
po illebiare s'anneu.
Abberìdebos nessi calchi olta
domos de idda mia,
po narrer chi no' est beru
chi sa idda est mesu molta
e chi est falzu su lumene
chi bos dana: domos de disisperu.